აშშ-ის პრეზიდენტმა, დონალდ ტრამპმა გამოცემა The Telegraph-თან ექსკლუზიურ ინტერვიუში განაცხადა, რომ ის სერიოზულად განიხილავს ნატოდან გასვლის შესაძლებლობას მას შემდეგ, რაც ალიანსი ირანის წინააღმდეგ ომს არ შეუერთდა.
აშშ-ის პრეზიდენტმა ნატო „ქაღალდის ვეფხვად“ მოიხსენია და დასძინა, რომ ამერიკის გამოსვლის გადაწყვეტილება კოლექტიური თავდაცვის ხელშეკრულებიდან ახლა „გადახედვას არ ექვემდებარება“.
როგორც გამოცემა წერს, ტრამპის დღევანდელი განცხადება მიანიშნებს იმაზე, რომ თეთრი სახლი ევროპას თავდაცვით სფეროში საიმედო პარტნიორად აღარ აღიქვამს მას შემდეგ, რაც მათ ტრამპის თხოვნა ჰორმუზის სრუტის დასაცავად გემების გაგზავნის შესახებ უარყვეს.
ჟურნალისტმა ტრამპს ჰკითხა, გადახედავს, თუ არა ის აშშ-ის წევრობას ნატოში კონფლიქტის დასრულების შემდეგ. „დიახ, ვიტყოდი, რომ ეს გადახედვას აღარ ექვემდებარება“, – განაცხადა ტრამპმა. „არასდროს მიზიდავდა ნატოს წევრობა. ყოველთვის ვიცოდი, რომ ის „ქაღალდის ვეფხვია“, სხვათა შორის პუტინმაც იცის ეს“.
The Telegraph-ის ინფორმაციით, ნატოს მოკავშირეები აშშ-ს არ ეხმარებიან ჰორმუზის სრუტის გახსნაში, რომლის მეშვეობითაც მსოფლიო ნავთობის 20% გადის. თეირანმა ფაქტობრივად ჩაკეტა სრუტე, რამაც ნავთობსა და გაზზე ფასების მკვეთრი მატება გამოიწვია.
ტრამპის განცხადებით, ის ომში ნატოს მოკავშირეების ჩართვას დაჟინებით არ ითხოვდა. მას ეგონა, რომ ეს ავტომატურად მოხდებოდა.
„ჩვენ იქ, უკრაინის ჩათვლით, ავტომატურად ვიყავით. უკრაინა ჩვენი პრობლემა არ იყო. ეს იყო შემოწმება და ჩვენ იქ მათ [ევროპელების] გამო ვიყავით და ყოველთვის მათთან ერთად ვიყავით. ხოლო ისინი ჩვენთან არ იყვნენ“, – დასძინა ტრამპმა.
