გამოცემა Axios-ის ინფორმაციით, აშშ, ირანი და რეგიონის ქვეყნების შუამავლები შესაძლო 45-დღიანი ცეცხლის შეწყვეტის შეთანხმებისთვის პირობებს განიხილავენ, რამაც შესაძლოა, საბოლოოდ ომის დასრულებაც გამოიწვიოს. ამის შესახებ გამოცემა საკითხზე ინფორმირებულ აშშ-ს, ისრაელისა და რეგიონულ წყაროებზე დაყრდნობით ავრცელებს.
წყაროების მიხედვით, მომდევნო 48 საათის განმავლობაში, როცა პრეზიდენტი ტრამპის მიერ დადგენილი ვადა იწურება, შეთანხმების მიღწევის შანსები მცირეა, თუმცა, ბოლო ძალისხმევა ერთადერთ შანსს იძლევა, რათა არ მოხდეს ომში შესაძლო ესკალაცია მას შემდეგ, რაც ტრამპი ირანის რეჟიმს სამოქალაქო ინფრასტრუქტურაზე იერიშებით დაემუქრა.
პარალელურად, წყაროებზე დაყრდნობით გამოცემა Reuters-იც წერს, რომ ომის დამთავრებასთან დაკავშირებით გეგმა აშშ-მ და ირანმაც მიიღეს, რომელიც შესაძლოა, ძალაში ორშაბათსვე შევიდეს და შედეგად ჰორმუზის სრუტე გაიხსნას.
ცნობისთვის, პრეზიდენტი ტრამპის მიერ ირანისთვის მიცემული 10-დღიანი ვადა ორშაბათს უნდა ამოწურულიყო, თუმცა, კვირას, 5 აპრილს, ტრამპმა Truth Social-ზე განაცხადა, რომ ახალი ბოლო ვადა ვაშინგტონის დროით სამშაბათს, 20:00 საათამდე (თბილისის დროით 7 აპრილის 04:00 საათამდე), გაახანგრძლივა.
კვირას ტრამპმა Axios-თან საუბრისას აღნიშნა, რომ აშშ ირანთან “სიღრმისეულ მოლაპარაკებებს” მართავს და დაამატა, რომ სამშაბათს, ვადის ამოწურვამდე, შეთანხმების მიღწევა შესაძლებელია.
“ამის კარგი შანსია, მაგრამ თუ შეთანხმებას არ დადებენ, იქ ყველაფერს ავაფეთქებ,” თქვა მან.
აპრილის დასაწყისში აშშ-ს პრეზიდენტი ირანის რეჟიმს ხიდებისა და ელექტროსადგურების განადგურებით დაემუქრა იმ შემთხვევაში, თუ ისინი ამერიკასთან შეთანხმებას არ დადებდნენ.
“ჩვენს არმიას, მსოფლიოს ნებისმიერ წერტილში უდიდესსა და ყველაზე ძლიერის, არც კი დაუწყია იმის განადგურება, რაც ირანში დარჩა. შემდეგი ხიდებია, მერე კი – ელექტროსადგურები!” – წერდა ტრამპი.
