ბათუმის საერთაშორისო აეროპორტი წელს უკვე მემილიონე მგზავრს მოემსახურა.
„ტავ ჯორჯიას“ ინფორმაციით, ეს უპრეცედენტო მოვლენაა ამ აეროპორტის არსებობის ისტორიაში.
„თბილისისა და ბათუმის აეროპორტების მმართველი კომპანიის, „ტავ ჯორჯიას“ გათვლებით წლის ბოლომდე ბათუმის აეროპორტში მგზავრთნაკადი ყველა დროის რეკორდს მოხსნის და 1,2 მილიონს მიაღწევს. ბათუმის საერთაშორისო აეროპორტის მემილიონე მგზავრი, გერმანიის მოქალაქე მიჰალ ნატოვიჩი საქართველოში ტურისტული ვიზიტით შვილებთან ერთად იმყოფებოდა. ის ბორტზე სიმბოლური ღონისძიებით გააცილეს.
ბათუმში 2025 წლის პირველი 9 თვის მონაცემებით, წინა წლის ანალოგიურ პერიოდთან შედარებით მგზავრთნაკადის ზრდა 32%-ია, პანდემიამდელ პერიოდთან შედარებით კი – 90%.
მგზავრთა რაოდენობის ზრდა უპრეცედენტო იყო 2025 წლის აგვისტოში. ბათუმის საერთაშორისო აეროპორტის არსებობის განმავლობაში პირველად, ის ერთი თვის განმავლობაში 200 000-ზე მეტ მგზავრს მოემსახურა (213,636). ისტორიული იყო 2025 წლის 24 აგვისტო, როცა აღნიშნულმა აეროპორტმა დღის განმავლობაში 9 000 მგზავრი გაატარა და 35 რეისი მიიღო და გააცილა.
მგზავრთნაკადის ზრდის ფონზე, „ტავ ჯორჯია“ მუდმივად ახორციელებს ინვესტიციებს ინფრასტრუქტურის განვითარებაში. მიმდინარე წელს ბათუმის საერთაშორისო აეროპორტში ასაფრენ-დასაფრენი ბილიკის რეაბილიტაცია დასრულდა, გაორმაგდა საჰაერო ხომალდების სადგომების რაოდენობა და ასევე, კომპანიამ შეიძინა ახალი ტექნიკა. ასევე, გამტარუნარიანობის გაზრდის მიზნით, მიმდინარე წელს მგზავრთა დახვედრის ზონისა და მოფრენის სივრცეში პასპორტის კონტროლის ზონის გაფართოება იგეგმება“, – აცხადებენ „ტავ ჯორჯიაში“.
