დავით ჩიხელიძე: პრემიერის მიერ ფასებთან დაკავშირებული განცხადებები ასახავს რეალობას და ეფუძნება ობიექტურ ეკონომიკურ ფაქტორებს, მაგრამ, ზოგიერთი მედია, მათ შორის, „ტვ პირველი“, ხშირად ფაქტებზე წინ აღქმებს და სიცრუეს აყენებს, რაც აზიანებს როგორც ქვეყნის, ისე საზოგადოების ინტერესს

„ხაზარაძის მარიონეტების მხრიდან სხვისთვის „მოღალატის“ იარლიყის მიწებება მინიმუმ ამორალურია, ზოგადად მსგავსი ტიპის და შინაარსის პოსტები, უფრო მეტად გამხმოვანებელს აზიანებს და არა ადრესატს.
ნარატივი, თითქოს კობახიძე მოღალატეა, საქართველოში არ მუშაობს და არ იმუშავებს, საზოგადოებას კარგად შეუძლია ერთმანეთისგან გაარჩიოს ემოციური პროპაგანდა და რეალობა. საზოგადოება ტვ პირველის დღის წესრიგით არ ცხოვრობს და ის საკუთარ შეფასებებს ფაქტებზე დაყრდნობით აყალიბებს.
რაც შეეხება პრემიერის მიერ ფასებთან დაკავშირებულ განცხადებებს, ისინი ასახავს რეალობას და ეფუძნება ობიექტურ ეკონომიკურ ფაქტორებს.
პრობლემა ის არის, რომ ზოგიერთი მედია, მათ შორის „ტვ პირველის“ წარმომადგენლები, ხშირ შემთხვევაში ფაქტებზე წინ აღქმებს და სიცრუეს აყენებენ, რაც აზიანებს როგორც ქვეყნის, ასევე საზოგადოების ინტერესს.“ – წერს ჩიხელიძე.