უკრაინაში რუსეთის მიერ სრულმასშტაბიანი შეჭრიდან ოთხი წლის შემდეგ, ტრამპის ადმინისტრაცია კიევს აიძულებს, რომ მშვიდობის სანაცვლოდ მტკივნეულ ტერიტორიულ დათმობებს დათანხმდეს- ამის შესახებ წერს Foreign Affairs.
სამშვიდობო შეთანხმების პროექტში, რომელიც პირველად ნოემბერში Axios-მა გაავრცელა, ადმინისტრაცია გვთავაზობდა, რომ ყირიმის, დონეცკისა და ლუგანსკის მთელი რეგიონები ფაქტობრივად რუსეთის ტერიტორიად აღიარებულიყო და რუსეთს შეენარჩუნებინა კონტროლი ხერსონისა და ზაპოროჟიეს იმ ნაწილებზე, რომლებსაც ამჟამად მისი ძალები იკავებენ.
სტატიის ავტორის თქმით, უკრაინის პრეზიდენტი ვოლოდიმირ ზელენსკი წინააღმდეგობას უწევს და უარს ამბობს ისეთი რამის გაკეთებაზე, რაც მისი ქვეყნის ტერიტორიულ მთლიანობას დაარღვევს. თუმცა, ბრძოლის ველის რეალობა მის მხარეს არ არის. ის მიიჩნევს, რომ უკრაინისთვის ტერიტორიის ნაწილობრივი დათმობა ცუდი, მაგრამ ყველაზე ნაკლებად ცუდი არჩევანია.
როგორც ავტორი აღნიშნავს, უკრაინა გმირულ წინააღმდეგობას უწევს, თუმცა მისი მონდომება ვერ მალავს იმ ფაქტს, რომ ომს აგებს. რუსეთი უკრაინის ტერიტორიის დიდ ნაწილს აკონტროლებს და კიევს მისი ჩამორთმევის მცირე შანსი აქვს, რაც უკრაინის 2023 წლის წარუმატებელმა კონტრშეტევამ აჩვენა. რა თქმა უნდა, რუსეთის ბოლოდროინდელი მიღწევები ძალიან ნელა და მნიშვნელოვანი ფასით მოხდა; ბოლო სამი წლის განმავლობაში რუსეთმა უკრაინის ტერიტორიის მხოლოდ ერთი პროცენტი დაიპყრო. თუმცა ეს არ ცვლის იმ რეალობას, რომ რუსეთი ამჟამად უკრაინის 1991 წლის საზღვრებში არსებული ტერიტორიის თითქმის მეხუთედს ფლობს – ან რომ რუსეთის უფრო დიდი რესურსები და მოსახლეობა ნიშნავს, რომ მოსკოვს შეუძლია ბრძოლა გააგრძელოს მომავალი წლების განმავლობაში. რუსეთის ამ უპირატესობების დაძლევა და ბრძოლის ველზე დაკარგული მიწების დაბრუნება დროსა და ინვესტიციებს მოითხოვს, რაც უკრაინას არ გააჩნია. ამიტომ, ამჟამინდელი გარემოებები კიევს კომპრომისული მშვიდობისკენ უბიძგებს – ისეთისკენ, რომელიც აუცილებლად მოიცავს უკრაინის ტერიტორიის დათმობას.
