პარლამენტის სესიაზე სიტყვით გამოსვლისას პარლამენტის საფინანსო-საბიუჯეტო კომიტეტის თავმჯდომარემ, პაატა კვიჟინაძემ, სახელმწიფო აუდიტის სამსახურის 2025 წლის საქმიანობის ანგარიშის მოსმენის შემდეგ, სამსახურის დანიშნულებაზე ისაუბრა და საპარლამენტო ოპოზიციის კითხვებს უპასუხა.
კვიჟინაძის განცხადებით, სახელმწიფო აუდიტის სამსახური თანამედროვე ინსტიტუტს წარმოადგენს და ის გერმანიისა და შვედეთის დიდი დახმარებით შეიქმნა.
„რაც შეეხება აქამდე არსებულ საუბარს, ყველაფერზე პასუხს ფიზიკურად ვერ გავცემ, იმიტომ, რომ კითხვების გადამწყვეტი უმრავლესობა საერთოდ არ ეხებოდა აუდიტის ანგარიშს. აი, განსაკუთრებით ბოლო ორი გამოსვლა: ერთი ეხებოდა ბიუჯეტის შესრულებას და მეორე — პროკურატურის მუშაობას. არავითარი კავშირი არ ჰქონია აუდიტის ანგარიშთან, აი, საერთოდ ერთი სიტყვაც არ ყოფილა მასზე.
ყველას მიმართ დიდი პატივისცემით, უბრალოდ მინდა ავხსნა, რა არის აუდიტის სამსახური და რას საქმიანობს. უნდა ვთქვათ და არ უნდა დავუკარგოთ — გერმანიისა და შვედეთის დიდი დახმარებით შეიქმნა ის, რაც გვაქვს და არის ერთ-ერთი მოწინავე. კიდევ ერთხელ გეუბნებით, რომ ევროკომისიამ მაქსიმალური შეფასება მისცა, მეტი რა უნდა გითხრათ ახლა, ჩვენი თუ არ გჯერათ.
ეს არის თანამედროვე ინსტიტუტი. ისინი დაგვეხმარნენ კვალიფიციური კადრებისა და სისტემის ჩამოყალიბებაში და ჩვენ დღეს გერმანული მოდელი გვაქვს. აუდიტის სამსახური წარმატებული ორგანიზაციაა და აკეთებს იმას, რაც ევროპაში ხდება.“- განაცხადა კომიტეტის თავმჯდომარემ.
კვიჟინაძე მიმართავს გახარიას პარტიის წარმომადგენლებს, რომ ევროპაში არსებული პრაქტიკის თანახმად ოპოზიციას უფრო მხარში უდგას აუდიტის სამსახური, ვიდრე პოზიციას და არსებობს კონსენსუსი, რომლის თანახმადაც ორივე მხარისგან უნდა ჰქონდეს მხარდაჭერა.
„მინდა ხაზი გავუსვა — აქვე ერთხელ ჩვენმა კოლეგამ ბრძანა, რომ უნდა მოგცეთ უფლებამოსილება, დაიჭიროთ ვიღაცაო. არ არის ევროპაში ეს მოდელი. ძლივს გარდავქმენით, რომ ყოფილიყო თანამედროვე ევროპული ინსტიტუტი, რომელიც მხოლოდ რეკომენდაციებს გასცემს და არავის არ იჭერს. ეს არის ევროპული ინსტიტუტები, ყველა. აი, ამას გვეუბნებიან და ამიტომ აქვს მას ასეთი მაღალი შეფასება. აუდიტის სამსახურის რომელიმე თანამშრომელს რომ უთხრათ, კონტროლის პალატა ხარო, ძალიან ეწყინება — მოსინჯეთ და ნახავთ. ეს სრულიად სხვა სისტემაა.
ახლა რას ნიშნავს ეს? ეს გვეუბნება იმას, რასაც ევროპაში ამბობენ (რასაც თქვენ ყოველ წუთას იძახით: „ევროპა, ევროპა“). ევროპაში ამბობენ, რომ აუდიტის სამსახური არის პარლამენტის თვალები. ანუ, ის ამოწმებს ყველაფერს. აქ მინისტრი რომ მოდის, ის, რა თქმა უნდა, იტყვის რაღაცებს, მაგრამ ჩვენ ხომ არ ვიცით, შიგნით რა ხდება? აუდიტის სამსახურს ასეულობით აუდიტორი ჰყავს, რომელიც ამას ამოწმებს და დებს დასკვნას. ეს დასკვნა თქვენც გჭირდებათ, ჩვენც გვჭირდება და მთავრობასაც სჭირდება. ის უნდა განხორციელდეს, თქვენ კი, პირიქით, ეჩხუბებით — ეს რატომ არის და ის რატომ არისო და ეუბნებით, ეს კი არა, ის უნდა ყოფილიყოო.
ისე, რომ იცოდეთ, საზღვარგარეთ ოპოზიციას უფრო გვერდზე უდგას და ეფერება აუდიტის სამსახური, ვიდრე პოზიციას. ევროპაში არსებობს კონსენსუსი, რომ აუდიტის სამსახურის მხარდაჭერა არის ორივე მხრიდან. რა არის აქ გაუგებარი?
აი, თუნდაც ბიუჯეტის განხილვა რომ იყო, ყველა შეკითხვა და ყველა ის მინუსი, რაც კი იპოვეთ, ყველაფერი აუდიტის დასკვნიდან ამოიღეთ. აუდიტის დასკვნა რომ არ გქონოდათ, მაინტერესებს, საერთოდ რას იტყოდით?“- განაცხადა პაატა კვიჟინაძემ.
