საქართველოს რკინიგზა ეხმაურება მედიაში გავრცელებულ ინფორმაციას, თითქოს კომპანიამ 200 ახალი სატვირთო ვაგონის შესყიდვის შესახებ ხელშეკრულება სანქცირებულ კომპანიასთან გააფორმა. აღნიშნული ინფორმაცია სიმართლეს არ შეესაბამება – კომპანია, რომელთანაც საქართველოს რკინიგზამ ხელშეკრულება გააფორმა ხაზგასმით აღვნიშნავთ, რომ სანქცირებული არ არის.
საქართველოს რკინიგზის გაჯანსაღებისა და ახალი მენეჯმენტის მიერ დანერგილი ეფექტური მიდგომების შედეგად, კომპანია სავაგონო პარკის მასშტაბურ განახლებას იწყებს. შეძენილი 200 ახალი სატვირთო ვაგონის პირველ პარტიას საქართველოს რკინიგზა უახლოეს დღეებში მიიღებს.
ეს არის პირველი შემთხვევა, როდესაც საქართველოს რკინიგზამ სატვირთო ვაგონები შუამავალი კომპანიის გარეშე, უშუალოდ მწარმოებელი ქარხნისგან შეიძინა. შუამავალი რგოლის გამორიცხვამ, მნიშვნელოვნად შეამცირა შესყიდვის ხარჯები და კომპანიას ფინანსური რესურსის დაზოგვის შესაძლებლობა მისცა.
შესყიდვა გამჭვირვალე და კონკურენტული პროცედურის საფუძველზე განხორციელდა. სხვადასხვა ქვეყნის მწარმოებლებს მონაწილეობის თანაბარი შესაძლებლობა ჰქონდათ, რამაც ჯანსაღი კონკურენციის პირობები უზრუნველყო და შესაბამისად, საქართველოს რკინიგზამ ფასისა და ხარისხის თვალსაზრისით, საუკეთესო შეთავაზება შეარჩია.
ხელშეკრულება საქართველოს რკინიგზისთვის ხელსაყრელი პირობებით გაფორმდა: თითოეული სატვირთო ვაგონის საექსპლუატაციო ვადა 22 წლის ნაცვლად 32 წელია, ხელშეკრულებაში გათვალისწინებულია მიწოდების მოკლე ვადა და კომპანიას არ აქვს საავანსო თანხის გადახდის ვალდებულება.
განსაკუთრებით აღსანიშნავია შესყიდვის ფასი – საქართველოს რკინიგზას სატვირთო ვაგონები ასეთ დაბალ ფასად ათწლეულებია არ შეუძენია. მიღებული შედეგი მაღალი კონკურენციის პირობებში ჩატარებული გამჭვირვალე შესყიდვისა და შუამავალი რგოლის გამორიცხვის ეფექტიანობაზე მიუთითებს.
საქართველოს რკინიგზას ამ რაოდენობის სატვირთო ვაგონების შესყიდვა ბოლო ათწლეულის განმავლობაში არ განუხორციელებია. სავაგონო პარკის განახლება კომპანიის გამტარუნარიანობის, ოპერაციული ეფექტიანობისა და კონკურენტუნარიანობის ზრდას ემსახურება.
ამასთან, საქართველოს რკინიგზა აგრძელებს სხვადასხვა მწარმოებლისგან წინადადებების მიღებას და ახალი სატვირთო ვაგონების შეძენას მომავალშიც გეგმავს.
საქართველოს რკინიგზა მედიასაშუალებებს მოუწოდებს, თავი შეიკავონ დაუზუსტებელი ინფორმაციის გავრცელებისგან.
