აგროვებენ შუამდგომლობებს და ისეთი ფორმით აყენებენ, რომ შეუძლებელია მისი დაკმაყოფილება,- განაცხადა საპარლამენტო უმრავლესობის წევრმა, თენგიზ შარმანაშვილმა ჟურნალისტებთან საუბრისას.
მან გუშინდელი სასამართლო პროცესი შეაჯამა და აღნიშნა, რომ ოპონენტები დროის გაჭიანურებას ცდილობენ.
„ორი რამ აჩვენა: ერთი, ჩვენს ოპონენტებს უნდათ დროის გაჭიანურება, რათა რაც შეიძლება, დიდხანს გაგრძელდეს ეს პროცესი, და თუ საერთოდ არ დამთავრდება დიდი ხანი ეს ურჩევნიათ. და მეორე, უბრალოდ აგროვებენ შუამდგომლობებს და ისეთი ფორმით აყენებენ, რომ შეუძლებელია მისი დაკმაყოფილება. მერე ალბათ ხმამაღლა განაცხადებენ: აი ჩვენ დავაყენეთ 17 შუამდგომლობა და არც ერთი არ დააკმაყოფილეს. რა თქმა უნდა, თუ სამართლებრივი საფუძველი არ არის და არასწორი ფორმით აყენებ შუამდგომლობას, არ დაკმაყოფილდება, მაგრამ მათ უბრალოდ ეს რიცხვი აინტერესებთ, მათ ხომ ყოველთვის აღქმები აინტერესებდათ ვიდრე ფაქტები და აი ამას აკეთებენ. რა თქმა უნდა, ჩვენ ყველას და ყველა ეტაპზე მივცემთ ამის განმარტებას და არ მივცეთ იმის საშუალებას, რათა ეს პროცესუალური ქმედება გამოიყენონ საპიაროდ“,-აღნიშნა შარმანაშვილმა.
შარმანაშვილი, ასევე, ოპონენტების განცხადებებს გამოეხმაურა, რომელთა თქმითაც, საქმეში არ ჩანს ვის რა ნაწილი ეხება ამ სარჩელიდან, რაზეც თქვა, რომ ტყუილია და ყველამ იცის, ვის რა ეხება.
„ეს არის აბსოლუტური ტყუილი, ძალიან ნათლად ჩანს, ვის რას ეხება, ხოლო თუ არ მოსწონთ, როგორი ფორმით არის გაკეთებული, ხო ელემენტარული ლოგიკაა- თუ ცუდად გავაკეთე, ხომ უნდა გაწყობდეს, უფრო ადვილად გააბათილებ, მაგრამ ამასთან რომ არ გვაქვს საქმე და პირიქით არის. ძალიან კარგად იციან, რომ სერიოზული მტკიცებულებები არსებობს, ამიტომ ნერვიულობენ და პიარულად აჩვენებენ თავის ბაბლს, მომხრეებსაც და უნდათ, რომ საზოგადოებასაც თავს მოახვიონ, თითქოს იქ არაფერი არ არის. არაფერი რომ არ იყოს, ძალიან მშვიდად იქნებოდნენ“,-განაცხადა თენგიზ შარმანაშვილმა.
