არარეალური იყო ის ყველაფერი, თვითონ მეპატრონეც საუბრობდა, რომ იქ არანაირი დაზიანება არ იყო. ჯერ მარტო იმ კაცის ჩვენება არის საკმარისი, რომ იქ არანაირი დაზიანება არ იყო, – ასე უპასუხა 2011 წლის 26 მაისის აქციის დარბევის შემდეგ დაღუპული სულიკო ასათიანის შვილმა, პაატა ასათიანმა, წამყვანის შეკითხვას „თუ მოუნახულებია ის ადგილი, სადაც, როგორც არწმუნებდნენ, მამამისი დენის დარტყმის შედეგად გარდაიცვალა“, გადაცემაში „რეჟიმის ანატომია“.
როგორც ასათიანი იხსენებს, „ნაციონალური მოძრაობა“ აპირებდა, ფართის მეპატრონე, ოლეგ ჟვანია, შეთითხნილი ბრალდებით დაეკავებინა იმის გამო, რომ ოჯახს სულიკო ასათიანის გარდაცვალების ოფიციალური ვერსია დაეჯერებინა.
„მე პროკურატურაშიც ვიყავი მაგ თემაზე და ხშირად ვესაუბრებოდი, რომ ეს ყველაფერი ბლეფი იყო და რეალობასთან არ იყო შესაბამისობაში. მაგ შეკითხვაზე ვერც იმათ გამცეს დამაჯერებლად პასუხი. არარეალური იყო ის ყველაფერი, თვითონ მეპატრონეც საუბრობდა, რომ იქ არანაირი დაზიანება არ იყო. ჯერ მარტო იმ კაცის ჩვენება არის საკმარისი, რომ იქ არანაირი დაზიანება არ იყო.
მინდა ერთი რამ დავამატო, რომ გავიგეთ, ტელევიზიით ყველაფერი გადაიცემოდა, რომ ეს ბატონი [ფართის მესაკუთრე] დაიჭირეს. მე მივედი, ვინც ჩვენს საქმეში იყო შუაში ჩამდგარი და ვინც პასუხისმგებელი იყო ჩვენს გაჩერებაზე და პირდაპირ ვუთხარი: იმ კაცის ცოდვას ნუღარ გვადებ თავზე, გადაეცი ეს ზემდგომებს, თორემ, მართლა არ გავჩერდებით-მეთქი, მართლა ბრძოლას დავიწყებთ-მეთქი. მერე გავიგეთ, რომ მალევე გამოუშვეს ის კაცი და გაგვიხარდა, მისი ცოდვა მაინც არ დაგვადეს თავზე – შეთითხნილი ბრალდებით უნდა დაეჭირათ კაცი, რომ ჩვენთვის დაეჯერებინათ, თითქოს, დენმა მოკლა. ეს თხოვნა შეასრულეს და გამოუშვეს ის ბატონი. ჩემი მხრიდან, რაც შემეძლო ის გავაკეთე, მეტი ვერაფერი,“ – აღნიშნა პაატა ასათიანმა.
ჯიხურის მეპატრონე, ოლეგ ჟვანია, 2011 წლის 26 მაისის დარბევის შემდეგ გარდაცვლილი სულიკო ასათიანის და ნიკა კვინტრაძის შესახებ იხსენებდა: „თუ ვიტყოდი, რომ [ჯიხურის სახურავზე] რამე დაზიანება მქონდა და ამიტომ გარდაიცვალა ის ხალხი, იყო შემოთავაზება ორი მილიონი. შემდეგ იყო მუქარები, ამბობდნენ, რომ მთავრობას მოუვიდა შეცდომა, ამხელა ჩირქს ხომ არ ჩამოიკიდებს კისერზე, აიღე ორი მილიონი და წადი, დაისვენე საზღვარგარეთ ან სადღაც. მე-6 დღეს, როდესაც კვლავ უარი მიიღეს დამაპატიმრეს.“
2011 წლის 26 მაისს, აქციის დარბევის შემდეგ, თავისუფლების მეტროს მიმდებარე ტერიტორიაზე, ჯიხურის სახურავზე ორი მამაკაცის – სულიკო ასათიანის და ნიკა კვინტრაძის ცხედრები იპოვეს. ოფციალური ვერსიით, ორივე მათგანი დენის დარტყმის შედეგად გარდაიცვალა.
