პრეზიდენტმა დონალდ ტრამპმა აშშ-ის უზენაეს სასამართლოში მიმდინარე საქმეებზე ისაუბრა, რომლებიც ქალთა სპორტში ტრანსგენდერი სპორტსმენების მონაწილეობას ეხება, და გააკრიტიკა ის მოსამართლეები, რომლებიც, მისი შეფასებით, „აქტიურად იბრძოდნენ იმისთვის, რომ კაცებს ქალთა სპორტში ეთამაშათ“.
სამშაბათს, თეთრ სახლში გამართულ პრესკონფერენციაზე ტრამპმა ჟურნალისტებს განუცხადა, რომ იმ მოსამართლეებმა, რომლებიც ტრანსგენდერი სპორტსმენების სარჩელების მხარეს ჩანან, „სანდოობის დიდი ნაწილი უნდა დაკარგონ“.
„ეს უზარმაზარი საქმეა უზენაეს სასამართლოში. ვერ ვიჯერებ იმას, რაც ვიხილე. ზოგი მოსამართლე ძლიერად იბრძოდა იმისთვის, რომ კაცებს ქალთა სპორტში თამაშის უფლება ჰქონოდათ. რამდენიმე მათგანი განსაკუთრებით დაუჯერებელია. ჩემი აზრით, ვინც ასეთ გადაწყვეტილებას მიიღებს, სანდოობის დიდ ნაწილს დაკარგავს. ჩვენ კი კაცებს ქალთა სპორტში თამაში ავუკრძალეთ“, განაცხადა ტრამპმა.
„უბრალოდ შეხედეთ რეკორდებს. ძალოსნობაში, ცურვაში, მძლეოსნობაში. ეს არ არის სამართლიანი და ქალებისთვის უკიდურესად დამამცირებელია“.
მანამდე ტრამპმა გააკრიტიკა როგორც უზენაესი სასამართლოს ზოგიერთი მოსამართლე, ასევე ყოფილი პრეზიდენტის, ჯო ბაიდენის ადმინისტრაცია, ქალთა სპორტში ტრანსგენდერი სპორტსმენების მხარდაჭერის გამო.
„წინა ადმინისტრაციას ან საერთოდ არაფერი ესმოდა, ან უბრალოდ ძალიან ცუდად იქცეოდა. მათ რეალურად წარმოდგენაც არ ჰქონდათ, თუმცა ერთი იდეა მაინც ჰქონდათ. ისინი დღემდე ცდილობენ კაცების ქალთა სპორტში თამაშის იდეის გაყიდვას. ეს უზენაეს სასამართლოშიც გამოჩნდა. ზოგი მოსამართლე მათთვისაც იბრძოდა“, თქვა ტრამპმა.
„ისინი იბრძოდნენ ამისთვის, მაგრამ ყველამ ნახა, რომ ქალთა სპორტში კაცების მონაწილეობა არ მუშაობს“.
