ორშაბათს, დიდმა ბრიტანეთმა გაამკაცრა საზღვარგარეთიდან პოლიტიკური დაფინანსების მარეგულირებელი წესები, რაც მიზნად ისახავს საარჩევნო პროცესზე უცხოური ფინანსური გავლენის პრევენციას. აღნიშნული გადაწყვეტილება მიღებულია იმ ფონზე, როდესაც იზრდება შეშფოთება იმასთან დაკავშირებით, რასაც „საეჭვო დაფინანსება“ უწოდა ბრიტანელმა მინისტრმა სტივ რიდმა.
გასულ წელს, მთავრობამ პოლიტიკაში უცხოური ფინანსური ჩარევის გადახედვის გადაწყვეტილება მიიღო მას შემდეგ, რაც Reform UK-ის ყოფილი პოლიტიკოსი პრორუსული გამოსვლებისა და განცხადებების გასაკეთებლად ქრთამის აღებისთვის დააპატიმრეს.
მიმოხილვის თანახმად, დიდი ბრიტანეთი მუდმივი პრობლემის წინაშე დგას, რადგან უცხო ქვეყნები, მათ შორის რუსეთი, ჩინეთი და ირანი, ცდილობენ გავლენა მოახდინონ ქვეყნის დემოკრატიაზე და შეარყიონ ის, რამაც მთავრობა აიძულა ახალი წესები შემოეღო.
ამიერიდან პოლიტიკურ კანდიდატებს მოეთხოვებათ კანდიდატობამდე მიღებული 2,230 ფუნტზე მეტი შემოწირულობის დეკლარირება და დაამტკიცება, რომ ნებისმიერი წინასაარჩევნო დაფინანსება ლეგიტიმური წყაროებიდან იყო მიღებული.
„უცხოელი დონორებისთვის უფრო მკაცრი სტანდარტების დაწესებით და კანდიდატებისგან მათი დაფინანსების წყაროს დამტკიცების მოთხოვნით, ჩვენ მსოფლიოში წამყვან ზომებს ვიღებთ ჩვენი არჩევნების მთლიანობის დასაცავად და საზღვარგარეთიდან მომდინარე საფრთხეებთან გასამკლავებლად“, – განაცხადა რიდმა განცხადებაში.
