Financial Times-ის ინფორმაციით, პეკინის დაზვერვამ Salt Typhoon-ის სახელით ცნობილი კიბეროპერაცია გამოიყენა აშშ-ის კონგრესის წამყვანი კომიტეტების საკომუნიკაციო არხებზე წვდომის მისაღებად. გამოცემა წერს, რომ ჩინეთმა გატეხა წარმომადგენელთა პალატის გავლენიანი კომიტეტების თანამშრომლების მიერ გამოყენებული ელექტრონული ფოსტის სისტემები, რაც ფართომასშტაბიანი კიბერსადაზვერვო კამპანიის ნაწილი იყო.
სტატიის თანახმად, ინფორმირებულ წყაროებზე დაყრდნობით, ჩინეთის დაზვერვამ წვდომა მოიპოვა წარმომადგენელთა პალატის ჩინეთის საკითხებზე მომუშავე კომიტეტის გარკვეული თანამშრომლების, ასევე საგარეო საქმეთა, დაზვერვისა და შეიარაღებული ძალების კომიტეტების თანაშემწეების ელექტრონულ ფოსტაზე. აღნიშნული კიბერშეტევები დეკემბერში დაფიქსირდა და წარმოადგენს ჩინეთის სახელმწიფო უსაფრთხოების სამინისტროს მიერ აშშ-ის საკომუნიკაციო ქსელების წინააღმდეგ განხორციელებული ოპერაციების ბოლო ეპიზოდს. ერთ-ერთი წყაროს თქმით, ამ ეტაპზე დაუდგენელია, ჰქონდა თუ არა სამინისტროს პირდაპირი წვდომა თავად კანონმდებლების ელექტრონულ ფოსტაზე.
იაპონური გამოცემა The Asahi Shimbun, რომელიც Reuters-ზე დაყრდნობით წერს, აღნიშნავს, რომ ინფორმაცია დაუყოვნებლივ ვერ დადასტურდა. თეთრ სახლს კომენტარი არ გაუკეთებია, ხოლო ვაშინგტონში ჩინეთის საელჩომ, ჩინეთის საგარეო საქმეთა სამინისტრომ და ოთხივე კომიტეტის ოფისმა შესაბამის კითხვებს ოპერატიულად არ უპასუხეს.
ამასთან, ნოემბერში სენატის სერჟანტმა კონგრესის რამდენიმე ოფისი გააფრთხილა „კიბერინციდენტის“ შესახებ, რომლის დროსაც ჰაკერებს შესაძლოა წვდომა ჰქონოდათ არაპარტიულ კონგრესის ბიუჯეტის ოფისსა და სენატის ზოგიერთ სტრუქტურას შორის კომუნიკაციაზე. აღნიშნული ოფისი კანონმდებლებს ფინანსური კვლევის მნიშვნელოვან მონაცემებს აწვდის.
Salt Typhoon-ის სახელით ცნობილი ჰაკერული ოპერაციები დიდი ხანია შეშფოთებას იწვევს აშშ-ის სადაზვერვო წრეებში. ოფიციალური პირების შეფასებით, ჰაკერებმა შესაძლოა ჩაწერეს სატელეფონო საუბრები, მათ შორის მაღალი რანგის პოლიტიკოსებსა და მთავრობის წარმომადგენლებს შორის. აშშ-ის ხელისუფლებამ ადრე განაცხადა, რომ აღნიშნული ჯგუფი პოტენციურად მზად არის ჩინეთთან კონფლიქტის შემთხვევაში კრიტიკული ამერიკული ინფრასტრუქტურის პარალიზებისთვის.
თავის მხრივ, პეკინი სისტემატურად უარყოფს კიბერშეტევებში მონაწილეობას. გასული წლის დასაწყისში აშშ-მა სანქციები დაუწესა სავარაუდო ჰაკერს, იინ კეჩენგს, და ერთ-ერთ ჩინურ კიბერუსაფრთხოების კომპანიას სიჩუანში.
