“დღეს კობა დავითაშვილი 55 წლის გახდა… არიან ადამიანები, რომელთა ღირსებას, ჰუმანიზმს, ნათელ გონებას, სიმამაცეს, სიყვარულისა და თავგანწირვის უნარს ვერასოდეს ვივიწყებთ, ჩვენი გულთამპყრობელია მისი ადამიანური ხიბლი და სიმაღლე”- წერს პედაგოგი მაკა სახურია სოციალურ ქსელში.
იგი კობა დავითაშვილს იხსენებს და ამბობს, რომ მის მიმართ ჩადენილი სისასტიკე და ცოდვა არ მოასვენებს არც მიშა სააკაშვილს და არც იმ ადამიანებს, ვისაც მისი დალეწვა და განადგურება დაავალა.
“ასეთი იყო კობა, დიდი და დიდებული ადამიანი, უგზოუკვლოდ განათლებული და მოაზროვნე, ენერგიული, მხიარული, უმამაცესი, შინაგანად თავისუფალი, ლაღი, კაცთმოყვარე. საუკეთესო მეოჯახე, ხუთი რჩეული შვილის მამა, მუდამ ქვეყნის წარსულსა და მომავალზე დაფიქრებული მებრძოლი.
სხვა სულ რომ არაფერი დაეშავებინა სააკაშვილის რეჟიმს, კობა დავითაშვილის მიმართ ჩადენილი სისასტიკე და ცოდვა არ მოასვენებს არც მიშას და არც იმ ადამიანებს, ვისაც მისი დალეწვა და განადგურება დაავალა. ვერ მოერია ყოფილი მეგობრის სიმართლეს, სინათლეს, სიდიდეს და ბოლომდე გაიმეტა სასიკვდილოდ.
ვისაც კობასთან ურთიერთობის ბედნიერება გქონიათ, დამეთანხმებით, რომ საოცარი ადამიანი იყო, ყველაზე მზრუნველი, მეგობრული, ამტანი, გამტანი, გამცემი, კეთილი ენერგიით სავსე. შეურყეველი კლდე იყო თავისი სიმამაცითა და სიძლიერით. რას არ ისწავლიდი მისგან?
მშვიდად განისვენე, მეგობარო! ყველგან იდექი, სადაც შენს ქვეყანას სჭირდებოდი დემოკრატიული და სამართლიანი სახელმწიფოს მშენებლობაში. ღირსეული ოჯახი დაგრჩა. შენი შვილები გასახელებენ შენც და ჩვენს ქვეყანასაც ისევე გამოადგებიან, როგორც შენ! ჩემი უდიდესი სიყვარული და პატივისცემა ინგას, უკეთილშობილეს თანამებრძოლს თავისი საყვარელი მეუღლისას!”- წერს მაკა სახურია.
