მოლდოვის პრეზიდენტმა მაია სანდუმ განაცხადა, რომ თუ ოდესმე რუმინეთთან გაერთიანების საკითხთან დაკავშირებით რეფერენდუმი ჩატარდება, ის გაერთიანებას დაუჭერს მხარს. მისი თქმით, მოლდოვისთვის სულ უფრო რთული ხდება დამოუკიდებლად „გადარჩენა“, – ამის შესახებ Politico წერს.
სტატიის ავტორი აღნიშნავს, რომ რუმინეთსა და უკრაინას შორის მოქცეული დაახლოებით 2.4 მილიონი მოსახლეობის მქონე მოლდოვა რუსული ჰიბრიდული ომის სამიზნე გახდა.
„თუ რეფერენდუმი გაიმართება მე რუმინეთთან გაერთიანებას დავუჭერდი მხარს“, – განაცხადა სანდუმ ბრიტანულ პოდკასტში ინტერვიუს დროს.
„შეხედეთ, რა ხდება დღეს მოლდოვის გარშემო. შეხედეთ, რა ხდება მსოფლიოში“, – განმარტა სანდუმ და დასძინა, რომ “ისეთი პატარა ქვეყნისთვის, როგორიც მოლდოვაა, სულ უფრო და უფრო რთული ხდება, რომ გადარჩეს, როგორც დემოკრატიული, სუვერენული ქვეყანა და, რა თქმა უნდა, რუსეთისთვის წინააღმდეგობის გასაწევად”
მიუხედავად პირადი მხარდაჭერისა, სანდუმ აღნიშნა, რომ რუმინეთთან გაერთიანებას მოლდოვის მოსახლეობის უმრავლესობა მხარს არ უჭერს.
გამოკითხვების მიხედვით, მოლდოველთა დაახლოებით ორი მესამედი გაერთიანების წინააღმდეგია, მაშინ როდესაც ამ იდეის მხარდაჭერა რუმინეთში უფრო მაღალია.
