შეფასებისა და გამოცდების ეროვნული ცენტრი 2026 წლის ერთიანი ეროვნული გამოცდებისთვის მოსამზადებელი საინფორმაციო კამპანიის ფარგლებში შეხვედრებს აგრძელებს. ამჯერად შეხვედრა გორის სახელმწიფო უნივერსიტეტში გაიმართა, სადაც აბიტურიენტებს შესაძლებლობა ჰქონდათ, საგამოცდო პროცესთან დაკავშირებულ მნიშვნელოვან საკითხებზე უშუალოდ ცენტრის დირექტორისა და წარმომადგენლებისგან მიეღოთ ამომწურავი ინფორმაცია.
შეხვედრაზე მონაწილეებს დეტალურად განემარტათ გამოცდებზე რეგისტრაციის ეტაპები, ვადები და პროცედურული თავისებურებები.
განხილული იყო რეგისტრაციის პროცესში ყველაზე ხშირად დაშვებული შეცდომები, მათ შორის მონაცემების არასწორად შევსება, საგნების არასწორი კომბინაცია და საფასურის გადახდის ვადების დაუცველობა.
განსაკუთრებული აქცენტი გაკეთდა საგანმანათლებლო პროგრამების შერჩევის სტრატეგიასა და პრიორიტეტულობის სწორად განსაზღვრაზე. საუბარი შეეხო უნივერსიტეტებში ჩარიცხვის პროცესს, რომელიც, ცენტრის წარმომადგენლების განცხადებით, ეფუძნება განაცხადში პროგრამების თანმიმდევრობას, სისტემა პირველ რიგში განიხილავს პირველ პოზიციაზე მითითებულ პროგრამას, რის გამოც არჩევანის რიგითობა კრიტიკულად მნიშვნელოვანია. შესაბამისად, პროგრამების ჩამონათვალი უნდა ასახავდეს აბიტურიენტის რეალურ ინტერესებსა და შესაძლებლობებს.
აღინიშნა, რომ აბიტურიენტებს პროგრამების დამატება, შეცვლა ან გაუქმება აპელაციის შედეგების გამოქვეყნებიდან მომდევნო დღის 18:00 საათამდე შეუძლიათ. ასევე, სარეგისტრაციო სივრცე მიმდინარე კონკურსის მონიტორინგის შესაძლებლობასაც უზრუნველყოფს, რაც აბიტურიენტებს ინფორმირებული გადაწყვეტილების მიღებაში ეხმარება.
შეფასებისა და გამოცდების ეროვნული ცენტრი მოუწოდებს აბიტურიენტებს, საგანმანათლებლო პროგრამების არჩევისას იმოქმედონ გააზრებულად, წინასწარ განსაზღვრონ საკუთარი მიზნები და განსაკუთრებული ყურადღება დაუთმონ პრიორიტეტულობის სწორად განსაზღვრას, რაც საბოლოო შედეგზე მნიშვნელოვან გავლენას ახდენს.
