გარემოს დაცვისა და სოფლის მეურნეობის სამინისტროს შპს „საქართველოს მელიორაცია“ ქვეყნის მასშტაბით სამელიორაციო ინფრასტრუქტურულ პროექტებს უწყვეტ რეჟიმში ახორციელებს. ინფორმაციას „საქართველოს მელიორაცია“ ავრცელებს.
„შიდა ქართლში, ქალაქ ქარელის ტერიტორიაზე წისქვილის არხის 1,5 კილომეტრიანი მონაკვეთი იწმინდება. საირიგაციო არხით ქარელისა და სოფელ ზემო ხვედურეთის მოსახლეობა სარგებლობს.
ჩატარებული სამუშაოები არხში წყლის შეუფერხებლად გადინებას უზრუნველყოფს. შედეგად, დაახლოებით 70 ჰექტარ სასოფლო-სამეურნეო მიწის ფართობზე სარწყავი წყლის მიწოდება გაუმჯობესდება, რაც უხვი და ხარისხიანი სასოფლო-სამეურნეო პროდუქციის წარმოების გაზრდას შეუწყობს ხელს.
სამუშაოებს საქართველოს მელიორაცია საკუთარი ძალებით ახორციელებს და დასრულების ეტაპზეა.
აღსანიშნავია, რომ 2012-2024 წლებში, შიდა ქართლის რეგიონში განხორციელებული სამელიორაციო ინფრასტრუქტურული პროექტების შედეგად, წყალუზრუნვეყოფილია დამატებით 20 000 ჰექტარზე მეტი სასოფლო-სამეურნეო მიწის ფართობი, ხოლო სარწყავი წყლის მიწოდება 15,685 ჰექტარზე გაუმჯობესდა”, – ნათქვამია ინფორმაციაში.
