„ეშმაკი ატარებს „პრადას“ სიქველის პირველი თიზერი გამოქვეყნდა

კინოკომპანიამ 20th Century Studios ფილმის „ეშმაკი ატარებს „პრადას 2“ პირველი თიზერი წარადგინა. 52-წამიან ვიდეოში მერილ სტრიპის გმირი – მირანდა პრისტლი ჟურნალ Runway-ს ოფისში მიდის და შემდეგ ლიფტში ენ ჰეთუეის პერსონაჟს – ენდის ხვდება.

უკვე ცნობილია ფილმის სიუჟეტის დეტალებიც – სიქველში მირანდა პრისტლი გამოცემა „პოდიუმის“ გადარჩენას ცდილობს, რომელიც ბეჭდური მედიის პოპულარობის დაკარგვის გამო კრიზისშია. თავიანთ როლებს დაუბრუნდნენ პირველი ნაწილის მთავარი როლების შემსრულებლები – მერილ სტრიპი (მირანდა პრისტლი), ენ ჰეთუეი (ანდრეა საქსი), ემილი ბლანტი (ემილი) და სტენლი ტუჩი (ნაიჯელი).

პრემიერა 2026 წლის მაისში შედგება – ორიგინალური სურათის გამოსვლიდან 20 წლის შემდეგ.