საქართველოს სპორტის მინისტრმა, შალვა გოგოლაძემ ქართული სპორტის წლევანდელი მიღწევები და ამ სფეროში განხორციელებული სიახლეები „იმედის კვირასთან“ შეაჯამა.
მინისტრის თქმით, ქართველმა სპორტსმენებმა წელს გამართულ შეჯიბრებებზე 1935 მედალი მოიპოვეს, რაც უპრეცედენტოა.
„ისტორიული შედეგია. აქედან 752 იყო ოქროს მედალი. ეს ჩვენი პატარა ქვეყნისთვის უდიდესი სპორტული შედეგი იყო და დარწმუნებული ვარ, რომ ამ შედეგზე ქართული სპორტი არ გაჩერდება.
ჩვენ უნიკალური წელი გვქონდა 2024 წელი – უნიკალური შედეგებით, მაგრამ ჩვენმა სპორტსმენებმა მოახერხეს და გაზარდეს ეს სპორტული შედეგი. შესაბამისად, ეს გვაძლევს იმის თქმის უფლებას, რომ 2026 უფრო უკეთესი იქნება, 2027 კიდევ უფრო უკეთესი და ქართული სპორტი უფრო და უფრო წინ და წინ წავა“, – აღნიშნა სპორტის მინისტრმა.
მან მადლობა გადაუხადა საქართველოს პრემიერ-მინისტრს იმ გადაწყვეტილებისთვის, რომლითაც სპორტის სამინისტრო დამოუკიდებელ ინსტიტუტად ჩამოყალიბდა.
„ეს არ იყო მხოლოდ და მხოლოდ ადმინისტრაციული ნაბიჯი. ეს იყო მკაფიო გზავნილი ჩვენი სპორტისთვის, სპორტსმენებისთვის, რომ პრიორიტეტია სპორტი. შესაბამისად, სპორტის სამინისტრო არ შეიქმნა იმისთვის, რომ მხოლოდ და მხოლოდ შედეგი, რაც გვქონდა, ეს შეგვენარჩუნებინა. პირიქით, ჩვენ სხვა არაფერი დაგვრჩენია, გარდა იმისა, რომ ვიფიქროთ საქართველოში სპორტის განვითარებაზე, მის მასობრიობაზე, ინფრასტრუქტურის შექმნაზე, ახალი მწვრთნელების წამოყვანაზე, რაც შეიძლება, მეტი ახალგაზრდა სპორტსმენის ჩართვაზე ქართულ სპორტში“, – განაცხადა შალვა გოგოლაძემ.
ამასთან, მინისტრმა ისაუბრა UFC-ის პრეზიდენტთან, დეინა უაითთან გამართულ მოლაპარაკებებზეც, რომელიც UFC-ის შეჯიბრების საქართველოში ჩატარებას ეხება.
„მე მქონდა პატივი ამა წლის აპრილის თვეში ვყოფილიყავი ამერიკაში მერაბ დვალიშვილის ჩხუბზე, სადაც მქონდა შესაძლებლობა ერთი საათის განმავლობაში შევხვედროდი დეინა უაითს. ძირითადი ჩვენი მესიჯი იყო ის, რომ საქართველო იმსახურებდა, მიეღო ეს პრესტიჟული ტურნირი. ჩვენ უკვე დაახლოებით, სამი თუ ოთხი რაუნდი გვქონდა UFC-ის წარმომადგენლობასთან. მათ მოითხოვეს დეტალური ინფორმაცია, თუ სად, როგორ ვაპირებდით, რა შეჯიბრი ჰქონდა ამა თუ იმ დარბაზს მიღებული.
მოგეხსენებათ წელს ჩვენ ვუმასპინძლეთ MMA-ის მსოფლიო ჩემპიონატს და ერთ-ერთ საუკეთესოდ ჩატარდა. საუბარია, უნივერსიტეტის ქუჩაზე მდებარე 10 ათას-კაციან დარბაზზე. ყველა ეს ინფორმაცია მივაწოდეთ. სხვათა შორის, დარბაზმა მოწონება დაიმსახურა. შესაბამისად, ახლა მიდის ტექნიკური საკითხების გავლა“, – განაცხადა შალვა გოგოლაძემ.
