„უკრაინა ქვრივებისა და ობლების ერი ხდება და ქვეყანა დემოგრაფიული კატასტროფის წინაშე დგას“, – მასალას ამ სათაურით CNN-ი აქვეყნებს.
გამოცემის ცნობით, ომის მეოთხე წლისთავის მოახლოებასთან ერთად, უკრაინაში შობადობის მაჩვენებელი რეკორდულად ეცემა. მოსახლეობის დიდ ნაწილს რეპროდუქციული პრობლემები აქვს. ხოლო ისინი, ვისაც შვილის გაჩენა შეუძლიათ, ქვეყანაში არსებული პირობების გამო ამ ნაბიჯს სამომავლოდ დებენ. პარალელურად, ფრონტის ხაზზე დანაკარგები იზრდება, მილიონობით ლტოლვილი კი საზღვარგარეთ დარჩა.
უკრაინის მოსახლეობის რაოდენობა და სიმჭიდროვე ომამდეც საკმაოდ დაბალი და ძალიან არათანაბრად განაწილებული იყო. თუმცა, ომის დაწყებიდან დღემდე, უკრაინამ დაახლოებით 10 მილიონი ადამიანი დაკარგა – მათ შორის ისინი, ვინც დაიღუპა, ქვეყანა დატოვა ან რუსეთის მიერ ოკუპირებულ ტერიტორიებზე დარჩა. და მიუხედავად იმისა, რომ ქვეყანაში შობადობა წლების განმავლობაში მცირდებოდა (რაც მთელი ევროპისთვის საერთო ტენდენციაა), ახლა ეს პროცესი თითქმის სრულ კოლაფსამდე მივიდა.
„ეს გამოწვევები უკრაინას მსოფლიოში ერთ-ერთი ყველაზე მძიმე დემოგრაფიული კრიზისის წინაშე აყენებს, – აღნიშნულია სტატიაში.
