შეეცადნენ ისეთი განცხადებები გაეკეთებინათ, ისეთი შეფასებები, თითქოს საქართველო თავის ფუნქციებს კარგავს როგორც სატრანზიტო ქვეყანა და ა.შ., – განაცხადა გადაცემაში „დღის ქრონიკა“ საქართველოს პარლამენტის თავმჯდომარის მოადგილე გიორგი კახიანმა ილჰამ ალიევის განცხადების დამახინჯებული ვერსიის გავრცელებასთან დაკავშირებით.
კერძოდ, აზერბაიჯანის პრეზიდენტმა, ილჰამ ალიევმა დავოსში განცხადება გააკეთა, რომ „ტრანზიტი პირდაპირ სომხეთიდან აზერბაიჯანის გავლით იქნება უზრუნველყოფილი”. აღნიშნულს ოპოზიციის მხრიდან სპეკულაციები მოჰყვა.
გიორგი კახიანის თქმით, ილჰამ ალიევის განცხადებასთან დაკავშირებით ოპოზიციის შეფასებები სრულიად გაუგებარი და სრულიად ამოვარდნილია საერთო კონტექსტიდან.
„შეეცადნენ ისეთი განცხადებები გაეკეთებინათ, ისეთი შეფასებები, თითქოს საქართველო თავის ფუნქციებს კარგავს როგორც სატრანზიტო ქვეყანა და ა.შ. დებატები სწორედ ამის შესაძლებლობას მოგცემდა, საზოგადოებას დაენახა რეალურად რაზეა საუბარი.
ფაქტობრივად, რამდენიმე წლის წინ საომარ ვითარებაში იყო ეს ორი ქვეყანა, რაც თავის მხრივ, რეგიონისთვის ძალიან მძიმე იყო. მაშინ, როდესაც ეს ყველაფერი იცვლება, მშვიდობა მყარდება და ამ ორ ქვეყანას შორის შესაძლებელი ხდება მათ შორის სატრანზიტო მიმოსვლა, რა თქმა უნდა, ეს მხოლოდ მისასალმებელი შეიძლება იყოს. მთლიანობაში, ეს არის მშვიდობა რეგიონში, ეს არის მეტი მიზიდულობა საერთაშორისო ინვესტიციებისთვის და ა.შ.“, – აღნიშნა მან.
