ბათუმში, სასწრაფოს ექიმებმა ქალი მანქანაში ამშობიარეს – დაიბადა ჯანმრთელი გოგონა. ახალგაზრდა პაციენტისთვის ეს მესამე მშობიარობა იყო, – ინფორმაციას Facebook-გვერდი “შენი სიცოცხლის გადასარჩენად” ავრცელებს.

“ბათუმის ერთ-ერთი დასახლებიდან შემოვიდა გამოძახება ლოზუნგით – მშობიარობა. გამოძახებაზე მისულ ბათუმის #9 ბრიგადას ადგილზე დახვდა ორსული ახალგაზრდა ქალბატონი.

ექიმი ციური ჩაუშბა იხსენებს: – “ბინაზე მისულებს დაგვხვდა 37 კვირამდე ორსული ქალბატონი, რომელსაც მოვლითი სამშობიარო ტკივილები ჰქონდა დაწყებული. ცენტრალურ სადისპეტჩეროსთან დაკავშირებისა და ჰოსპიტალიზაციის მოთხოვნის პარალელურად, მყისიერად მოხდა პაციენტის მდგომარეობის შეფასება და დავიწყეთ მისი ჰოსპიტალიზაცია. ტრანსპორტირების პროცესში პაციენტს დაეწყო მშობიარობა, რის გამოც შევწყვიტეთ გადაადგილება და ახალ სიცოცხლესთან შესახვედრად მოვემზადეთ. ძალიან მალე, სულ რაღაც რამდენიმე წუთში დაიბადა ჯანმრთელი გოგონა. დედაც და ჩვილიც სტაბილური მდგომარეობით ბათუმის ერთ-ერთ სამშობიაროში იქნენ შეყვანილნი.

ჩვენი ახალგაზრდა პაციენტისთვის ეს მესამე მშობიარობა გახლდათ. აღსანიშნავია, რომ მსგავსი შემთხვევების დროს მნიშვნელოვან როლს ასრულებს ის სამეანო ნაკრები, რომელიც ჩვენი ცენტრის სასწრაფო დახმარების თითოეულ ბრიგადას სამედიცინო აღჭურვილობაში გვაქვს. სწორედ ამ ნაკრების დახმარებით მოხდა ახალშობილისა და დედისთვის სრულყოფილი დახმარების გაწევა.

ცალკე აღნიშვნის ღირსია ჩემი ბრიგადის წევრების გიული დიასამიძისა და რომან თურმანიძის პროფესიონალიზმი და მინდა მათ ამისათვის დიდი მადლობა გადავუხადო”.

ექიმი ციური ჩაუშბა 1997 წლიდან ბათუმის სასწრაფოს დახმარების ექიმია. ამ წლების განმავლობაში მას უამრავ პაციენტთან ჰქონია გამოძახება, თუმცა მანქანაში მშობიარობის მიღება მის სამედიცინო პრაქტიკაში პირველად მოხდა და როგორც თავად გვითხრა, ეს სიხარული მანამდე განცდილს არც კი შეედრება.

ექიმი ციური ჩაუშბა

ექთანი გიული დიასამიძე

მძღოლი და რომან თურმანიძე