„დინამო თბილისისა“ და „აიაქსის“ ლეგენდების მატჩში ნვანკვო კანუც ითამაშებს

19 ოქტომბერს „დინამო არენაზე“, „დინამო თბილისის“ 100 წლის იუბილესთან დაკავშირებით, ლეგენდების მატჩი გაიმართება – ყველაზე ტიტულოვანი ქართული კლუბის ვეტერანები ამსტერდამის „აიაქსის“ ლეგენდებს ეთამაშებიან.

ცნობილი გახდა, რომ მატჩში, რომელიც „სპორტს ორიენტის“ ორგანიზებით ტარდება, მონაწილეობას „აიაქსის“ ერთ-ერთი ყველაზე ტიტულოვანი ნიგერიელი ფეხბურთელი ნვანკვო კანუც მიიღებს, რომელმაც ნიდერლანდურ გრანდში 75 მატჩი ჩაატარა და 27 გოლი გაიტანა.

კანუ „აიაქსში“ ჩემპიონთა ლიგის გამარჯვებული გახდა, ამას გარდა, ნიდერლანდების სამგზის ჩემპიონი და სუპერთასის მფლობელია.

ნიგერიელმა ფორვარდმა 1996 წელს ნიგერიის ნაკრებთან ერთად ოლიმპიური ჩემპიონობა იზეიმა, 1996 და 1999 წლებში ორჯერ დასახელდა აფრიკის საუკეთესო ფეხბურთელად.