ომანში გამართული მოლაპარაკებების დროს თეირანმა უარყო აშშ-ის მოწოდება საკუთარ ტერიტორიაზე ურანის გამდიდრების შეწყვეტის შესახებ. ამის შესახებ სააგენტო Reuters-ს რეგიონულმა დიპლომატმა განუცხადა, რომელიც თეირანისგან მიღებულ ინფორმაციას ეყრდნობა.
მიუხედავად ამისა, ირანული მხარე აცხადებს, რომ მზად არის განიხილოს გამდიდრების „დონე და სისუფთავე“ ან რეგიონული კონსორციუმის შექმნის საკითხი.
თეირანში მიიჩნევენ, რომ ამერიკელმა მომლაპარაკებლებმა „გაიგეს ირანის პოზიცია გამდიდრებასთან დაკავშირებით“ და თეირანის მოთხოვნების მიმართ მოქნილობა გამოიჩინეს.
წყაროს ინფორმაციით, ირანის სარაკეტო შესაძლებლობების საკითხი მოლაპარაკებების დღის წესრიგში არ ყოფილა და მხარეებს ამაზე არ უმსჯელიათ.
