სამხრეთ ამერიკაში მეცნიერებისთვის აქამდე უცნობი დინოზავრის ნამარხი აღმოაჩინეს. სიკვდილის მომენტში მას პირში გადაშენებული ნიანგის ძვალი ჰქონდა. აღმოჩენის ასაკი დაახლოებით 66 მილიონი წელია.
ახალი სახეობა, სახელად Joaquinraptor casali, მეგარაპტორების ჯგუფს მიეკუთვნება. მისი ჩონჩხი არგენტინაში, რიო-ჩიკოში ჯერ კიდევ 2019 წელს ამოიღეს. მეცნიერები განსაკუთრებით დაინტერესდნენ ნიანგის მხრის ძვლით, რომელიც მტაცებლის ყბებს შორის იყო მოქცეული. „ეს აღმოჩენა საშუალებას გვაძლევს ვივარაუდოთ, რომ დინოზავრი, შესაძლოა, სიკვდილის მომენტში ნიანგით იკვებებოდა“, – აღნიშნა ლუსიო იბირიკუმ მეცნიერულ და ტექნიკურ კვლევათა ეროვნული საბჭოდან.
მკვლევრებმა ჩონჩხის მნიშვნელოვანი ნაწილი აღადგინეს – თავის ქალა, მალები, კიდურების ელემენტები და ორი ბრჭყალი: ერთ-ერთი მათგანი, რომელიც ადამიანის წინამხრის ზომისაა, სავარაუდოდ, მსხვერპლის ხორცის დასაგლეჯად გამოიყენებოდა. Joaquinraptor-ის სიმაღლე შვიდ მეტრს აღწევდა, ის სულ მცირე, ერთ ტონას იწონიდა. ძვლოვანი ქსოვილის ანალიზმა აჩვენა, რომ სიკვდილის მომენტში ინდივიდი არანაკლებ 19 წლისა იყო.
ტირანოზავრი უფრო დიდი ზომებით გამოირჩეოდა, არგენტინულ მეგარაპტორს უკეთ განვითარებული წინა კიდურები ჰქონდა. მეცნიერთა აზრით, ორივე მტაცებელი თავიანთ ეკოსისტემებში საკვები ჯაჭვის სათავეში იდგა.
