საზოგადოების დეტალური ინფორმირების მიზნით, გვსურს გამოვეხმაუროთ ერთ-ერთი მედიასაშუალებით გავრცელებულ მანიპულაციურ და დეზინფორმაციულ განცხადებას იმის თაობაზე, რომ საქართველოს შინაგან საქმეთა სამინისტრომ თითქოს არამიზნობრივად გახარჯა ბიუჯეტის სახსრები უცხოელ არალეგალთა ქვეყნიდან გაძევების პროცესში.
პირველ რიგში მნიშვნელოვანია საზოგადოებამ იცოდეს, რომ გავრცელებული ინფორმაცია არის სრული მანიპულაცია და მიზნად ისახავს საზოგადოების შეცდომაში შეყვანას.
განცხადებაში მითითებულ პერიოდში, კერძოდ 2025 წლის ივნისიდან დღემდე საქართველოდან გაძევებულია 2300-მდე ქვეყანაში არალეგალურად მყოფი უცხოელი, რომელთაგან, მხოლოდ და მხოლოდ 2%-ის გაძევების ხარჯების ანაზღაურება უზრუნველყო სახელმწიფომ, ხოლო დარჩენილმა 98%-მა თავად აანაზღაურა დაბრუნების ხარჯები.
რაც შეეხება გავრცელებულ დეზინფორმაციას, რომ თითქოს მხოლოდ ერთი უცხოელის წარმოშობის ქვეყანაში, ერთი მიმართულებით, ბილეთის შესაძენად სამინისტრომ 2000 ლარამდე დახარჯა, ესეც წარმოადგენს მიზანმიმართულ მანიპულაციას. კერძოდ, საერთაშორისო სტანდარტების დადგენილი მოთხოვნების შესაბამისად, არალეგალი უცხოელის, იძულების წესით, საქართველოდან გაძევების დროს, აუცილებელია მიგრაციის თანამშრომლების მიერ ესკორტირების (გაცილების) განხორცილება, რათა სრულად იქნეს დაცული უსაფრთხოების მოთხოვნები. შესაბამისად, სახელმწიფოს მიერ გაწეული ხარჯი მოიცავს, როგორც შინაგან საქმეთა სამინისტროს თანამშრომლების გამგზავრებისა და დაბრუნების, ასევე თავად გასაძევებელი პირის მგზავრობის ხარჯებს.
უნდა აღნიშნოს, რომ ძირითად შემთხვევებში, ესკორტი შედგება სამინისტროს შესაბამისი დანაყოფის მინიმუმ ორი წევრისაგან, თუმცა რიგ შემთხვევებში, კონკრეტული ავიაკომპანიების მოთხოვნის შემთხვევაში, საჭიროა სამი წევრის ჩართულობა.
საზოგადოების ინფორმირების მიზნით განვმარტავთ, რომ გაძევების ღონისძიებები წარმოადგენს სამართლებრივად გაწერილ და საერთაშორისო სტანდარტებთან სრულ შესაბამისობაში განხორციელებულ პროცესს, რომლის მიზანია ქვეყანაში არალეგალური მიგრაციის პრევენცია და მიგრაციული წესრიგის დაცვა.
მიგრაციული კონტროლის ეფექტიანი აღსრულება არ არის მხოლოდ ადმინისტრაციული პროცესი — ეს არის სახელმწიფოს უსაფრთხოების, სამართლებრივი წესრიგისა და ქვეყნის ინტერესების დაცვის მნიშვნელოვანი მექანიზმი. სწორედ ამიტომ, მიგრაციის დეპარტამენტი აგრძელებს კანონის ფარგლებში ეფექტიან და თანმიმდევრულ მუშაობას, რათა ქვეყანაში შენარჩუნდეს უსაფრთხო და მოწესრიგებული მიგრაციული გარემო.
კონკრეტულ მედია საშუალებებს და მათთან დაკავშირებულ პირებს კი, მოვუწოდებთ, რომ თავი შეიკავონ დეზინფორმაციული, მანიპულაციური და გადაუმოწმებელი ინფორმაციის გავრცელებისგან, რათა არ მოხდეს საზოგადოების განზრახ შეცდომაში შეყვანა.
