Twitter-ის თანადამფუძნებელმა ბიზ სტოუნმა და Pinterest-ის თანადამფუძნებელმა ევან შარპმა წარადგინეს აპლიკაცია Tangle – ახალი სოციალური სერვისი, რომელიც გაცნობიერებულ ცხოვრებაზეა ორიენტირებული. პროექტის შესახებ Financial Times-ი წერს. პუბლიკაციაში Tangle-ი მოხსენიებულია, როგორც თანამედროვე სოციალური ქსელების „ანტიდოტი“.
სოციალური პლატფორმა ეკუთვნის კომპანია West Co.-ს, რომელიც სტოუნმა და შარპმა 2023 წელს დააფუძნეს. FT-ს მონაცემებით, სტარტაპმა პროდუქტის განვითარებისთვის 29 მილიონი დოლარის ინვესტიცია მოიზიდა.
West Co.-ს ვებგვერდზე Tangle-ი აღწერილია, როგორც ინსტრუმენტი, რომელიც მომხმარებლებს ეხმარება ცხოვრების მიზანმიმართულად დაგეგმვაში, ყოველდღიური მოვლენების დაფიქსირებასა და იმ კავშირების თვალყურის დევნაში, რომლებიც პირად გამოცდილებას აყალიბებს. აპლიკაციაზე წვდომა ამჟამად მხოლოდ მოწვევით არის შესაძლებელი. მომხმარებლებს სთავაზობენ გაუზიარონ მეგობრებს პირადი მიზნები და განზრახვები, დაუჭირონ მხარი ერთმანეთს და განიხილონ დასახული ამოცანების მიღწევის გზები. დეველოპერები ხაზს უსვამენ, რომ სერვისი არ არის ორიენტირებული კონტენტის ტრადიციულ „ფიდზე“.
სტოუნმა Financial Times-თან ინტერვიუში განაცხადა, რომ პროდუქტი ტესტირების ადრეულ ეტაპზეა და საჯარო გაშვებამდე შესაძლოა მნიშვნელოვნად შეიცვალოს. მისი თქმით, ისეთი სერვისის შექმნა, რომელიც ადამიანებს ცხოვრებაში ორიენტირებაში ეხმარება, რთული ამოცანა აღმოჩნდა.
შარპმა კი აღნიშნა, რომ პროექტი სმარტფონებისა და სოცქსელების საყოველთაო მოხმარების შედეგების შემცირების მცდელობაა. მან დასძინა, რომ ფიქრობდა ისეთ პროდუქტზე, რომელიც ნაწილობრივ მაინც აანაზღაურებდა ციფრული პლატფორმების ნეგატიურ გავლენას ადამიანების ფსიქიკასა და ემოციურ მდგომარეობაზე.
